𝗜𝗟𝗢𝗜𝗟𝗢 𝗖𝗜𝗧𝗬 —Hugot nga ipatuman sang Land Transportation Office (LTO) Region 6 ang pagpangdakop sa mga unconsolidated kag indi rehistrado nga mga salakyan sa Western Visayas.
Sa interview sang Bombo Radyo kay Atty. Gaudioso Geduspan, Officer-in-Charge (OIC) Regional Director sang LTO 6 , iya ginpahayag nga kasunod sang pag-anunsyo ni President Ferdinand Marcos Jr. nga padayunon ang Public Utility Modernization Program (PUVMP) kinahanglan man nga pasangkaron ang pagbantay sang ahensya sa mga unconsolidated nga salakyan nga makabig na nga colorom.
Suno kay Geduspan, tuman ka importante kon consolidated kag rehistrado ang isa ka salakyan bangud nagalakip ini sang insurance nga magaprotekta para sa mga komyuters sa tion sang disgrasya.
Ginpahayag man sini nga ginahulat pa sang talatapan ang guidelines sang Department of Transportation (DOTr) agud nga masiguro ang mga tikang nga himuon batok sa mga magabayolar sang patakaran.
Ginklaro man sang natungdan nga insigida nila nga dakpon ang nga salakyan nga indi rehistrado ilabi na nga nagbalik na ang klase nga mas nagpadako sang risgo sa mga posible disgrasya nga matabo.
