Ginpasigurado sang Land Transportation Office (LTO) nga wala sang white wash nga matabo sa imbestigasyon natuhoy sa driver sang 10-wheeler truck nga nakabunggo sa Sports Utility Vehicle (SUV) sa Barangay Amamaros, Pototan, Iloilo.
Ang mga biktima amo ang mag-asawa nga sakay sang SUV amo sanday Emil kag Merren Pagtolon-an, lunsay 36 anyos, kag residente sang Barangay Bagacay, Passi City.
Samtang ang driver sang amo nga truck amo si Regent Albacete, 20, kag residente sang Hibao-an Sur, Mandurriao, Iloilo City.
Sa exclusive interview sang Bombo Radyo kay Atty. Allan Sacramento, legal counsel kag pinuno sang operations division sang LTO Region VI, iya ginpahayag nga magapatigayon sila sang motu propio investigation ukon kaugalingon nga imbestigasyon sa natabo nga aksidente sa diin napatay ang mag-asawa nga manunudlo kag seaman.
Suno kay Sacramento, ginmanduan man nila ang ila field unit sa Barotac Nuevo, Iloilo nga makig-angot sa Pototan Municipal Police Station agud makuha ang dugang nga impormasyon natuhoy sa natabo nga aksidente agud idugang man sa ila nga kaugalingon nga imbestigasyon.
Ginpahayag ni Sacramento nga ginahulat man nila nga magpasaka sang complaint ang pamilya sang mga biktima.
Sa tion nga mapamatud-an nga may paglapas sa traffic rules and regulations ang driver sang truck nga nakabunggo sa SUV, i-revoke ukon kuhaon ang driver’s license sini nga isa man sa ginakabig pinakamataas nga penalidad nga mahatag sa driver ilabi na kun nakatuga ini sang pagkadula sang kabuhi.
Nagpamalibad man ang natungdan nga maghatag sang konklusyon natuhoy sa kun sin-o ang may sala sa aksidente bangud nagapadayon pa ang ila nga imbestigasyon.
Nahibaluan nga nagapangatubang sang kaso nga Reckless Imprudence Resulting to Double Homicide and Damage to Property ang 20 anyos nga driver sang 10-wheeler truck.
