𝗣𝗔𝗩𝗜𝗔, 𝗜𝗟𝗢𝗜𝗟𝗢 — Wala sa gihapon maserbehan sang show cause order sang Land Transportation Office (LTO) Region 6 ang suspek nga nagbunggo sa mag-asawa sa Brgy. Pandac, Pavia, Iloilo.
Ang suspek amo si Rudolph ‘Bobot’ Chavez Dela Rosa, negosyante sang trucking services kag residente sang Calinog, Iloilo.
Sa amo nga insidente, patay gid si Rave Garcia, 33, samtang pilason naman ang asawa sini nga si Shefryl Madadero Garcia, 23, lunsay residente sang Brgy. Onate De Leon, Mandurriao, Iloilo City.
Sa interview sang Bombo Radyo kay Atty. Gaudioso Geduspan, Officer in Charge sang Land Transportation Office Region 6, iya ginpahayag nga sila ang may otoridad lamang sa administratibo nga bahin sang kaso, ini amo ang sanction batok sa driver’s license sang suspek.
Suno kay Geduspan, suspension ukon revocation sang driver’s license ang posible nila nga idagdag batok sa suspek agud nga indi na ini liwat nga makamaneho pa sang ano man nga sahi sang salakyan.
Gin-athag man sang natungdan nga ang issue sa ila nga bahin amo ang tikang batok sa lisensya sang suspek kag wala na sila sang hurisdiksyon sa kriminal nga aspeto sang kaso.
Ginpahayag man ni Geduspan nga wala nadagdagan sang show cause order ang suspek bangud ang balay sini sa Calinog, Iloilo ang nabaligya na, rason nga wala sang responsable nga indibidwal ang makabaton sang amo nga order.
