ILOILO CITY– Gin-athag sang Land Transportation Office Region 6 nga indi mahimo nga may angkas ang single nga motorsiklo, kun ini ang magbyahe bangud may yara sang ginpagwa nga Memorandum Circular ang Department of Transportation tuhoy sa operasyon sang transportasyon.
Sa interview sang Bombo Radyo kay LTO Region 6 Spokesperson Riza Otayde, iya ginpahayag nga wala ginapahanugutan ang pag-angkasanay sa motorsiklo, bangud kinahanglan nga mag-obserba sang physical distancing.
Kinahanglan suno sa iya nga kun magbyahe ang motorsiklo, nagakadapat nga ang driver lang ang sakay sini.
Suno kay Otayde, kun may yara sang paglapas sa memorandum sang Department of Transportation, may yara man ini sang nagakaigo nga penalidad apang sa subong, wala pa sila nagahatag sang ticket sa mga nagalapas kag sa baylo, ila ini ginasaway kag ginapahibalo nga bawal ang may angkas sa motorsiklo.
Pahayag pa ni Otayde, katuyu-an sang pagsulundan amo ang malikawan ang paglapta sang virus, kag sundon ang mando sang physical distancing.
Dugang pa sang natungdan, nagpadala na sang sulat ang Regional Director sang LTO kay Iloilo City Mayor Jerry Treñas, kag kay Iloilo Governor Arthur Defensor Jr. , nga kun mahimo reviewhon sang mga ini ang ginpagwa nga executive order tuhoy sa pag-angkas sa motorsiklo.
