Kumpirmado paagi sa isa ka video nga ginpost sa Youtube nga kasal na ang aktres nga si Jessy Mendiola kag aktor nga si Luis Manzano.
Ginpatigayon ang intimate wedding ceremony sa The Farm sa Lipa City, Batangas kun sa diin imbitado ang ila pamilya kag pila lang ka abyan.
Yara ang ginikanan ni Luis nga sanday Batangas 6th District Representative Vilma Santos kag aktor nga si Edu Manzano. Wala nakatambong ang iloy ni Jessy apang nag-upod man sa selebrasyon sang kasal sang iya anak paagi sa video call.
Suksok ni Jessy ang simple apang matahum nga gown nga himo ni Patricia Santos samtang suksok naman ni Luis ang pink suit nga himo ni Paulo Lazaro.
Matandaan nga 2016 sang ginkumpirma sang duha nga naga-date sila kag Disyembre 2020 sang gin-anunsyo ang ila nga engagement.
