Ano ang labot sang impeachment kay Vice President Sara Duterte sa kabuhi sang ordinaryo nga mga Pilipino?
Diri nga pamangkot naka-sentro ang pamuno sang opening statement ni House Lead Prosecutor kag Batangas Rep. Gerville Luistro sa imbukada nga adlaw sang impeachment trial batok kay Duterte kahapon, Hulyo 6.
Suno kay Luistro, nakahibalo siya nga tuman ka damo nga mga Pilipino ang natingala kun ano man ang kaangtanan sang ila adlaw-adlaw nga pagpangabuhi kun ipaidalom sa trial ang vice president.
Sabat sang kongresista, daku ang kaangtanan sang proceedings sa drivers, sa mga overseas Filipino workers, sa mga manunudlo, sa mga mamumugon, kag sa tanan nga ordinaryo nga mga pumuluyo.
Ini bangud suno sa iya, ang trial nga ini ang nakasentro sa bagay nga ginapanag-iyahan sang mga Pilipino — ang kwarta, ang pagsalig, kag ang kinamatarong nga magpanukot sang accountability.
Ginhalimbawa pa sini nga ginasilutan gani bisan ang gagmay lang nga mga tawo kun may mga iregularidad sa pag-uyat sang pondo.
Pahayag ni Luistro, wala sang tuyo ang impeachment trial nga magtimalos ukon magdaog sa pulitika kundi agud sabton ang pamangkot nga importante sa bwasdamlag sang Republika: “May pulos pa bala ang accountability sa pungsod?”
Nahibaluan nga ang mga akusasyon kay Duterte sa impeachment amo ang sala nga paggamit sang confidential funds, pamahog sa presidente, indi mapaathag nga manggad, kag pagpanuhol sa mga opisyal sang gobyerno.#
