ILOILO CITY- Ginpasiguro ni Sen. Risa Hontiveros nga pangitaan nila sang pamaagi agud madugangan ang budget para sa Department of Health sa masunod nga tuig.
Ini kasunod sang iya pagkadismaya nga P203.1B lang ang gintigana nga pondo sa ahensya sa proposed 2021 national budget.
Sa interview sang Bombo Radyo kay Sen. Risa Hontiveros, iya ginpahayag nga kuntani ikaduha ang DOH sa pinakadako nga budget kasunod sa Department of Education ilabi na subong nga dako ang pagkinahanglan sang ahensya sang pondo para sa pag-atubang sa COVID-19 pandemic kag ginalauman nga mangin magasto man ang mass vaccination sa tion nga may bakuna na batok sa balatian.
Gintawag pa ni Hontiveros nga anemic ang budget kag wala dapat ginakinot ang ikaayong lawas sang mga Pilipino.
Sa pihak sini, ginpahayag sang senadora nga may yara sang binilyon nga mga lump sum appropriations nga mahimo i-reallocate sa Department of Health.
Gintumod man sini ang lump sum fund sa idalom sang Office of the President nga mahimo gamiton agud madugangan ang budget sa nasambit nga ahensya.
Una na nga ginbuyagyag kag ginkwestiyon ni Senator Panfilo Lacson ang P469 billion sa proposed 2021 budget nga yara sa lump sums ukon ginpondohan na sa 2020 national budget apang ini ang hugot naman nga ginpanginwala sang Malacañang.
