Mas nagatunog ang huring-huring nga posible may matabo nga Duterte-Marcos tandem sa masunod nga national elections sa Pilipinas.
Ini matapos nakit-an ang pictures nga magkaupod sanday presidential daughter Davao City Mayor Sara Duterte kag mag-utod nga sanday anay Senator kag napierde nga vice presidential candidate Ferdinand “Bongbong” Marcos kag Senator Imee Marcos.
Sunod nga ginkumpirma ni Mayor Duterte nga nagpanyaga matuod sila apang wala na niya gindetalye kun ano ang ila gin-istoryahan.
Sa isa ka statement nga ginpagwa paagi sa Davao City information office, ginpasalamatan ni Mayor Duterte ang mga Marcos sa birthday greetings nga ginpalab-ot sa iya.Nahibaluan nga nagatunog man ang “Run, Sara, Run” campaign sang mga supporters ni Duterte apang wala sang kumpirmasyon kun mapadalagan gid man ini sa pagka-presidente.
