Madamo pa kun tani sang aktibidad ang Simbahang Katolika subong nga Lunes Santo apang ini ang ginkansela bangud sa kakugmat sa Coronavirus Disease 2019 (COVID-19).
Sa interview sang Bombo Radyo kay Father Elmo Montaño, kura paroko sang Parokya ni San Rafael Archanghel sa San Rafel, Iloilo, iya ginpahayag nga sa adlaw sang Lunes Santo, isa ka litro nga mamahalon kag mahamot nga langis ang ginpahid ni Maria sang Betania sa mga tiil ni Hesus samtang ang iya buhok ang gingamit sa pagpamala sini.
Suno kay Montaño, ginkadismaya ni Hudas ang ginhimo ni Maria bangud ang mahamot nga langis ang ginhatag kun tani sa mga pigado apang lipod sa ihibalo sang tanan, luyag lamang ni Hudas nga makuha ang nasambit nga langis agud nga makapangwarta.
Ginpahayag ni Montaño nga nagapakita lamang nga may yara sang duha ka sahi sang tawo sa kalibutan, ini amo ang may maayo nga debosyon kag ang may malain nga katuyu-an.
Sa pihak nga bahin, may yara kun tani sang retreat kag Via Crucis apang ini ang ginkansela magluwas sa misa sa tagsa ka parokya.
