Ginkumpiskar sang awtoridad ang walo ka malahalon nga mga salakyan nga ginapahayag nga naangot kay resigned Ako Bicol Representative Zaldy Co.
Ini paagi sa pagserbe sang search warrant sa sulod sang parking area sang condominium sa Bonifacio Global City (BGC).
Suno sa Criminal Investigation and Detection Group National Capital Region, siyam ka luxury cars ang subject sang ila dala nga warrant, apang walo lang ang nakit-an sa amo nga operasyon. Lakip diri ang Rolls-Royce, tatlo ka Cadillac Escalades, duha ka Lexus units, isa ka Mercedes-Benz, kag isa ka Toyota Sequoia.
Ginpahayag nga hungod nga gintago ang mga salakyan sa parking slots nga assigned sa condominium units.
Base sa inisyal nga impormasyon, naka-rehistro ang mga salakyan sa nagkalain-lain nga mga kumpaniya lakip na sa Sunwest Construction kun sa diin co-founder si Co, samtang ang iban nga salakyan naman ang naka-rehistro sa pangalan sang iya nga asawa.
Natigayon ang operasyon paagi sa Bureau of Customs (BOC), Highway Patrol Group (HPG), Criminal Investigation and Detection Group (CIDG), Southern Police District (SPD), kag Taguig City Police. Present man ang mga opisyal nagikan sa Independent Commission for Infrastructure (ICI).
Matandaan nga nagpasaka ang National Bureau of Investigation sang bag-o nga kaso nga plunder batok sa anay kongresista bangud sang ginaalegar nga kahilabtanan sini sa flood control corruption scandal. Nagapabilin ini nga at large.#
