Ginahingyo na sa Department of Agriculture (DA) nga i-check ang cold storage facilities sa pungsod sa posible nagakatabo nga hoarding sang luy-a matapos ang padayon nga pagpanglakaak sang presyo bisan pa may importasyon na nga ginapatigayon.
Ginduso ini sang farmers’ group nga Samahang Industriya ng Agrikultura (SINAG).
Base sa monitoring sang DA sa mga merkado sa Metro Manila, nagatupa na ang presyo sini sa P220 tubtub sa P350 kada kilo.
Suno naman kay Agriculture Assistant Secretary kag spokesman Arnel, 4,248 metric tons (MT) sang imported nga luy-a halin sa China ang nakaabot na sa Pilipinas kag 30% na ini sang kabug-usan nga volume nga ginapaabot sang gobyerno.
Ginpahayag sini nga ginpasugtan ni Agriculture Secretary Francisco Tiu Laurel Jr. ang importasyon bangud ang ginger-producing areas kaangay sang Calabarzon kag mga parte sang Sierra Madre ang apektado gid sang naglabay nga mga bagyo.
Apang suno kay De Mesa, dapat nga manubo sa P100 ang retail price sini nga produkto.
Suno naman sa SINAG, bisan manubo subong ang produksyon sa Nueva Ecija, nagalaum sila nga mangin normal na liwat ang local production sa Nobyembre ukon sa Disyembre.
Nahibaluan nga una naman nga ginpahayag sang Department of Agriculture nga ginakonsiderar sini nga mag-import man sang luy-a halin sa Indonesia kag Vietnam bilang alternatibo bangud mahal ang produkto nga halin sa China.
Gin-forecast anay sang Bureau of Plant Industry (BPI) nga 13,725 metric tons sang ginger imports ang kinahanglanon sang Pilipinas subong lamang nga tuig.#
