𝗠𝗔𝗔𝗦𝗜𝗡, 𝗜𝗟𝗢𝗜𝗟𝗢 — Kumbinsido ang Maasin Bureau of Fire Protection (BFP) nga wala sang natabo nga foul play sa nagluntad nga sunog nga gintunaan sang kamatayon sang tatlo ka mag-utod sa Barangay Dalusan, Maasin, Iloilo.
Sa interview sang Bombo Radyo kay Senior Fire Officer 3 Lira Villafranca, acting municipal fire marshal sang Maasin Fire Station, iya ginpahayag nga isa ka aksidente lamang ang natabo kag wala sang may nagtuyo nga sunogon ang puluy-an.
Suno kay Villafranca kag santo sa panaysayon sang opisyal sang barangay, wala sang may nagadumot ukon nagahingabot batok sa pamilya sang mga biktima.
Ginpahayag man sini nga wala sang sin-o man ang may motibo nga sunogon ang puluy-an kag tuyo lang sang dabok nga ginbilin sang iloy sang mga biktima nga maprotektahan ang iya anak batok sa lamok.
Ginpaathag man sang natungdan nga ‘accidental in nature’ ang nagluntad nga sunog.
Sa subong, yara na sa maayo nga kahimtangan ang nabilin nga duha ka mga kabataan nga nakaluwas sa sunog.
Nahibaluan man nga wala ang mga ginikanan sa ila balay sang amo nga tion bangud pareho ang mga ini nga namilasyon sa namatyan nga ginapahayag 200 metros ang distansya halin sa ila puluy-an.
