Maasin, Iloilo, ginahulat ang resulta sang RT-PCR test sang construction worker nga una nagpositibo sa rapid test

MAASIN, ILOILO – Ginapaidalom na sa home quarantine ang construction worker nga nagpositibo sa rapid testing sa banwa sang Maasin, Iloilo.

Sa interview sang Bombo Radyo kay Maasin Mayor Francis Amboy, iya ginpahayag nga bangud nagpositibo sa rapid test ang construction worker, gilayon ini nga ginpa-idalom sa confirmatory test ukon nasal swab test agud makumpirma kun bala positibo ini sa COVID-19.

Samtang nagahulat sa resulta, kaupod sang construction worker nga naka home quarantine ang iya pamilya nga iya man naka close contact.

Suno kay Mayor Amboy, nakapadulong sa syudad sa sulod sang duha ka adlaw ang construction worker bangud gin-require ini sa iya nga trabaho nga mag pa rapid test.

Nagpasalig man ang alkalde sa mga pumuluyo sang Maasin nga wala sang dapat nga kabalak-an bangud wala na sang may ginpadulongan pa ang construction worker.

Nagpangabay si Mayor Amboy nga updan sang pagpangamuyo ang construction worker nga mag negatibo lang ang iya resulta sa real time Reverse Polymerase Chain Reaction (RT-PCR) test.