ILOILO CITY– Ginpanginwala ni Maasin, Iloilo Mayor Francis Amboy nga security personnel sini ang jobhire sang munisipyo nga nakaluthang-patay sa isa ka cashier sang convenience store kadungan sang fiesta sa Barangay Bagacay West, Maasin, Iloilo.
Ang biktima amo si Angelo Miro, 23 anyos,residente sang nasambit nga barangay samtang ang suspek amo si June Masculino,38 anyos, detailed sa Mayor’s Office kag preso na subong sa Maasin Municipal Police Station.
Sa interview sang Bombo Radyo Maasin, Iloilo Mayor Francis Amboy, iya ginpahayag nga makabig nga supporter lang niya ang suspek bangud tumandok man ini sang banwa.
Suno kay Amboy, sa pagkamatuod, may yara man ini sang iya kaugalingon nga security personnel kag wala nalakip diri si Masculino.
Dugang ni Amboy, sa balay sang biktima pa nagkaon ang suspek antes natabo ang insidente bangod indi man magliwan ang mga ini.
Nahibaluan nga may caucus sa lugar ang grupo ni Amboy sang may natabo nga kinagamo rason nga nagpalupok sang warning shot ang suspek kag naigo sa ulo ang biktima.
