MAASIN, ILOILO – Wala nakahibalo ang mga pulis sa Maasin Municipal Police Station nga naka red alert status ang bug-os nga hanay sang Philippine National Police kadungan sang ginpatigayon nga nationwide transport strike.
Ini matapos nga anum ka pulis gikan sa nasambit nga police station nga wala sa ila designated post sang nagpatigayon sang inspection si Iloilo Police Provincial Office Director Police Col. Roland Vilela.
Sa interview sang Bombo Radyo kay Police Capt. Rico Candalisa, hepe sang Maasin Municipal Police Station, iya ginpahayag nga wala nakahibalo ang iban nga mga pulis nga naka red alert status ang bug-os nga hanay sang Philippine National Police bangud nga wala man napalapnag sang maayo ang impormasyon.
Suno kay Candalisa, bilang hepe, nakahihbalo siya nga naka-red alert status sila apang sang nagligad nga Setyembre 30, ang anum sa mga pulis ang naka-off duty, nagpa check-up kag naka sick leave.
Ang iban sa mga pulis suno kay Candalisa ang nakapauli na sa ila tagsa ka mga balay ukon may ginkadtu-an nga malayo sa police station kag alang-alang na nga makabalik.
