ILOILO — Aminado ang Maasin Water Treatment Plant and Weir nga yara na sa critical level ang tubig sa dam bangud sa nagapadayon nga El Niño Phenomenon.
Sa interview sang Bombo Radyo kay Engineer Ervin Miado, supervisor sang Maasin Water Treatment Plant and Weir, iya ginpahayag nga sang Marso 16 una nakit-an ang pagnubo sang lebel nga sa subong, yara na sa 93.66 elevation.
Suno kay Miado, apisar sang kritikal nga lebel sang tubig, masarangan sa gihapon sang dam nga makahatag sang 24 megaliters per day nga tubig sa mga water distributors kaangay na lamang sang Metro Pacific Iloilo Water (MPIW).
Ginpahayag man sang natungdan nga pati ang Sta. Barbara Water Treatment Plant ang apektado man sang tuman ka init nga tyempo sa diin manipis na man ang tubig nga makuha sa amo nga planta.
Nahibaluan nga sang Septyembre 2023, nagpatuman sang dredging ang Maasin Water Treatment Plant agud makatipon sang tubig kag mapreparahan ang El Niño subong nga 2024.
Padayon naman ang drilling sa pila ka mga water plant kaangay sa Cabatuan kag Sta. Barbara agud madugangan ang pondo sang tubig.
