ILOILO CITY – Ginakabig sang mga delegates sang Association of Southeast Asian Nations (ASEAN) kag Organisation for Economic Co-operation and Development (OECD) nga dako nga bulig para sa mga bag-o nga inobasyon, export kag kauswagan sang magagmay nga mga negosyo ukon Small and Medium Enterprises (SMEs), ang tatlo ka adlaw nga pagtililipon sa siyudad sang Iloilo.
Ini ang kabahin gihapon sa 50th ASEAN Ministerial Meeting apang sa sini nga kahigayunan, ang National Economic Development Authority (NEDA) na ang nagserbe nga lead agency.
Kapin 80 ka mga delegado nagikan sa ASEAN kag OECD member countries nga ginalakipan sang Australia, New Zealand, South Korea kag Gran Britanya, ang nagpakigbahin sa pagtililipon.
Sentro sang tatlo ka adlaw nga meeting ang maayo nga mga regulasyon sa ASEAN region kag kun paano ini magamit para sa pagpauswag sang magagmay nga negosyo.
Magluwas sa meetings, nagpatigayon man sang workshops kag gintalakay ang pagpanghangkat nga ginaatubang sang SMEs.
Subong nga adlaw, sa meeting kun sa diin host ang Pilipinas kag United Kingdom, ginpaambit sang Gran Britanya ang mga SMEs practices sini nga ginalantaw nga modelo sang ASEAN, para sa ipatuman sa rehiyon.
Matapos ang tatlo ka adlaw nga meetings, ginlibot sang mga delegates ang siyudad sang Iloilo kag nagbilib sa cultural heritage sang mga Ilonggo, gani nagalaum nga makabalik ang mga ini sa Iloilo City.