ILOILO CITY – Nakahanda na si former Iloilo City Mayor Jed Patrick Mabilog nga magtambong sa masunod nga hearing sang quad committee sa Kamara.
Matandaan nga nag-abot si Mabilog sa Ninoy Aquino International Airport sang Martes, Septyembre 10, matapos ang pito ka tuig nga pagpuyo sa Estados Unidos sang Amerika.
Sa interview sang Bombo Radyo kay Atty. Jeric Jucaban, legal counsel ni Mabilog, iya ginpahayag nga sa subong, wala pa sang tul-id gid nga topiko nga istoryahan sa hearing.
Apang ang sigurado lang suno sa abogado amo ang pag-tag ni former President Rodrigo Duterte kay Mabilog bilang drug protector kag mangin sa Iloilo City bilang most shabulized city.
Antes nagtakop ang ikalima nga joint hearing kagab-i, nag-manifest si Committee on Public Order and Safety Chairperson kag Santa Rosa City Rep. Danilo “Dan” Fernandez nga pakadtuon si Mabilog sa masunod nga schedule sang ila hearing.
Ini nga mega-panel nga ginatawag man nga “quadcom” ang ginabug-usan sang House Committee on Dangerous Drugs, Committee on Public Accounts, Committee on Public Order and Safety, kag Committee on Human Rights.
