ILOILO CITY – Nagpaathag si Presidente Rodrigo Duterte kun nga-a tubtob subong, iya gihapon ginapangita si anay Iloilo City Mayor Jed Patrick Mabilog.
Kadungan sang pagbisita sa Iloilo, ginpahayag sang Presidente nga sa pagsugod pa lang sang kampanya batok sa iligal nga droga, nagaguwa na ang ngalan ni Mabilog.
Suno pa kay Duterte, yara man ang pangalan ni Mabilog sa listahan sang Philippine Navy, Army kag PNP.
Ini ang rason suno kay Duterte nga wala na magbalik sa Pilipinas ang anay alkalde.
Apang dismayado ang presidente nga wala nagapati diri ang intelligence agencies sang Amerika.
Suno kay Duterte, ginhatag na niya ang pangalan ni Mabilog sa US intelligence.
Nahibaluan nga wala na nakapauli sa Pilipinas sa Mabilog sumugod sang ginmando sadto ni Duterte nga mangin pinuno sang Iloilo City Police Office si C/Insp. Jovie Espenido.
Duha ka beses naman nga na-dismiss sang Ombudsman sa serbisyo si Mabilog.