Mabilog, ginkwestyon si Dela Llana nga gintawag lawlaw ang iya proposed FOI ordinance

Ginkwestyon ni Iloilo City Councilor Sheen Marie Mabilog ang pagtawag ni Councilor Nene Dela Llana nga “lawlaw” ang proposed ordinance sang konsehala angot sa Freedom of Information.

Ini may kaangtanan sa pagbaisay sang duwa ka konsehal sa sesyon bangud nga may pareho man nga ordinansa nga ginproponer si Dela Llana nga kasubong man sa mas nauna nga ordinance nga gin-propose ni Mabilog.

Ang ordinansa nga gin-propose ni Mabilog ang may titulo nga “Iloilo City Freedom of Information 2025” samtang may titulo naman nga “Iloilo City Freedom of Information Ordinance” ang iya ni Dela Llana.

Sa interview sang Bombo Radyo kay Mabilog, iya ginpahayag nga draft pa lang ang nasambit nga proposed ordinance sini gani natingala ini kun ano ang basehan ni De la Llana nga tawgon ini nga lawlaw.

Suno kay Mabilog, sa pagkamatuod, sang ginpasar ini ni niya, si Dela Llana man ang nagsegunda sang motion gani nakibot ini sa pahayag sang upod nga konsehal.

Samtang, nagpabutyag naman sang pagkontra si Mabilog sa kaundan sang ordinansa ni Dela Llana kun sa diin nakabutang nga may bayad nga P50 ang kada pahina sang certified true copy sang mga dokumento nga pangayuon sang isa ka tawo.

Suno kay Mabilog, tuman ini ka mahal para sa mga pumuluyo kag kun luyag ni Dela Llana nga mangin income generating ordinance ini, indi diri kumporme ang konsehala.

Matandaan nga nagsugtanay na lang sanday Mabilog kag Dela Llana nga i-merge ang ila proposed nga ordinansa.

Magadepende na man sa committee chairman sang Commitee on Communication and Public Information nga si Councilor Sedfrey Cabaluna ang desisyon.