𝗜𝗟𝗢𝗜𝗟𝗢 𝗖𝗜𝗧𝗬 – Direkta nga ginsabat ni former Iloilo City Mayor Jed Patrick Mabilog ang issue nga gintanyagan ini sang executive amnesty kabaylo sang indi sini pagpadalagan sa mayoral race sa 2025 elections.
Sa interview sang Bombo Radyo kay Mabilog, iya ginpahayag nga ginhimo sang iya legal team ang tanan agud mapadalagan ini kuntani liwat.
Sa pamangkot naman kung magapangayo ini sang executive clemency kay President Ferdinand Marcos Jr., ginpahayag sini nga ginpasigurado sang iya mga abogado nga masolbar ang issue ilabi na nga nahatagan ini sang political asylum.
Nahibaluan nga indi mahimo makapadalagan si Mabilog sa anuman nga local elective office bangud sa ginapagwa nga dismissal order halin sa Ombudsman sa diin ang accessory penalty amo ang perpetual disqualification to hold public office.
Ini ang nag-ugat sa kaso nga ginpasaka ni former Iloilo City Councilor Plaridel Nava II kag anay Iloilo Provincial administrator Manuel Mejorada sang 2015 sa diin gin-akusaran nila si Mabilog sang grave misconduct, dishonesty, kag conduct prejudicial to the best interest of the service bangud sa paghatag sang lloilo City government sang kontrata sa 3L Towing Services nga wala nag-agi sa public bidding.
