Natalana nga imbitaron si former Iloilo City Mayor Jed Patrick Mabilog nga magtambong sa masunod nga hearing sang quad committee sa Kamara.
Antes nagtakop ang ikalima nga joint hearing kagab-i, Septyembre 12, nag-manifest si Committee on Public Order and Safety Chairperson kag Santa Rosa City Rep. Danilo “Dan” Fernandez nga pakadtuon si Mabilog sa masunod nga schedule sang ila hearing.
Ini nga mega-panel nga ginatawag man nga “quadcom” ang ginabug-usan sang House Committee on Dangerous Drugs, Committee on Public Accounts, Committee on Public Order and Safety, kag Committee on Human Rights.
Kahapon, nagsugod ang hearing pasado alas nueve sa aga kag nagtakop pasado alas nueve sa gab-i ukon buot silingon, 12 ka oras nga nagpungko ang mga mamalidha sa pagpisa-pisa sa mga pamangkot sa resource persons.
Lakip sa ginsentruhan sang diskusyon amo ang drug war ni anay Presidente Rodrigo Duterte kag ang ginaalegar naangot diri nga extra-judicial killings.
NGAA WALA SI MABILOG SA QUADCOM KAHAPON?
Kahapon pa lang, madamo na ang nagbantay kun insigida na nga magpungko si Mabilog bilang resource person sa Kamara.
Sa interview sang Bombo Radyo kay Atty. Jeric Jucaban, legal counsel ni Mabilog, ginpaathag sini nga ginahulat nila ang imbitasyon bangud indi man pwede nga mag-boluntaryo na lang sa pagpungko kag maghambal sa atubang sang mga mamalidha.
Suno kay Jucaban, kun may yara na sang formal invitation, handa ang former mayor nga magtambong kag mag-testify.
Matandaan nga nag-abot si Mabilog sa Ninoy Aquino International Airport (NAIA) sang Martes, Septyembre 10, matapos ang pito ka tuig nga pagpuyo sa Estados Unidos sang Amerika.
Insigida ini nga nag-surrender sa National Bureau of Investigation (NBI)-National Capital Region kag sa mga operatiba sang International Airport Investigation Division agud nga ma-submit ang kaugalingon sa legal proseso.
Kaangot ini sa arrest order sang Sandiganbayan 3rd Division kag Lapu-Lapu City Regional Trial Court Branch 73 batok sa former mayor bangud sa ginaalegar paglapas sa Republic Act No. 3019 ukon ang Anti-Graft and Corrupt Practices Act kag ang Code of Conduct and Ethical Standard.
Nagpiyansa ini gilayon kag nahatagan sang temporaryo nga kahilwayan matapos na-secure ang release orders halin sa Sandiganbayan kag sa Pasay City Regional Trial Court.
Agusto 2017 sang nagbiya si Mabilog sa Pilipinas matapos nga gin-tag ini ni Duterte bilang “narco-politician” kag ginasapubliko pa sang former president ang pamahog nga patyon ini bangud ginatum-ok sini si Mabilog nga protector sang illegal drug syndicates sa Western Visayas.
Sang nagligad nga bulan, sa una gid nga hearing sang quad committee, nabukaran ang isyu kay Mabilog sang ginpahayag ni Iloilo City Rep. Julienne “Jamjam” Baronda nga mahimo sini makumbinse si Mabilog nga magpauli sa Pilipinas kag limpyuhan ang iya pangalan amo man ang pagbansag anay ni Duterte sa Iloilo bilang “most shabulized city in the Philippines.”#
