Mabug-at nga trapiko ang nagsumalang sa mga pasahero kahapon kag kaina sang aga samtang nagalabay sa Ungka, Pavia , Iloilo kag Ungka, Jaro, Iloilo City.
Sa interview sang Bombo Radyo kay Joel Tanaleon, isa ka driver, iya ginpahayag nga malapit 1 ka oras ang ila nga paghulat agud makahalin sa ila nga nahamtangan.
Suno pa sa iya nga may iban nga pasehero nga nagpabutyag sang ila nga pagkadismaya bangud late na ang mga ini sa ila nga klase kag trabaho.
Pahayag pa ni Tanaleon, apektado man ang ila nga income bangud magluwas nga nadugayan sila sa trapiko, dako man ang nagastos sa ila nga gatong.
Nahibaluan nga may ginahimo nga pipelaying activity ang Metro Pacific Iloilo Water (MPIW) sa Ungka 1, Jaro.
Kaina ‘las 7 sang aga, isa lamang ka lane ang malabayan malapit sa Ungka Terminal kag nagbulig naman ang Iloilo City Traffic and Transportation Management Office sa pag-assist sang trapiko.
Pag-abot sa las 8 sang aga, ginbuksan sang ICTTMO ang zipper lane malapit sa Ungka Terminal, sa atubang sang Christ the King, agud mahagan-hagan ang trapiko.
Samtang sang nag-abot ang las 9 sa aga, nag-abiso ang MPIW nga ang temporaryo nga ginsirado nga lane ang mahimo na malabayan buot silingon duha na ka lane ang ginbuksan.
