Tuman ang kalipay sang beterana nga aktres nga si Judy Ann Santos sa nabaton sini nga pagkilala bilang Best Actress sa 2025 Fantasporto International Film Festival sa Portugal.
Kasunod ini sang iya gintungdan nga papel sa horror film nga “Espantaho”.
Una nga ginpasalamatan ni Juday ang jury ukon ang Fantasporto sa amo nga international acting award. Ginsiling sini nga daku nga bugal sa iya nga itiglawas ang iya pungsod Pilipinas.
Gin-share sini ang kadalag-an sa iya bana nga si Ryan Agoncillo (nga yara mismo naga-cheer para sa iya sa event), kag sa ila tatlo ka mga kabataan.
“I would like to thank the jury, Fantasporto for the recognition. It is with great pride and honor that I’m here to represent my country which is the Philippines. To my husband and to my three children, they’ve always been my inspiration in every project I make. I’m just so happy I will be bringing the best souvenir. Thank you,” kabahin sang iya nga acceptance speech.
Gin-dedikar man sini ang award sa director sang pelikula nga si Chito S. Roño kag sa tanan nga tawo nga yara sa likod sang amo nga horror film.
“Siyempre para sa inyo hindi. Hindi naman ako makakarating dito kung hindi kayo ang kasama ko. So to God be the glory. … Mabuhay ang Pilipinas!,” dugang sang award-winning actress.
Ikaapat si Juday nga Pilipino nga nakadala-pauli sang amo nga award halin sa Portuguese film festival nga nagasentro sa science fiction, fantasy kag horror movies.
Nadag-an man ini anay ni Barbie Forteza sa 2016 film nga “Laut”; Ian Veneracion sang 2018 sa “Ilawod” ; kag Cristine Reyes sang 2020 sa “UnTrue.”
Ang “Espantaho” ang isa sa official entries sa 2024 Metro Manila Film Festival kun sa diin si Juday man ang ginkilala sang award-giving body nga Best Actress.
