Halos indi mabaton sang amay sang lalaki nga nasal-an nga subject sa drug buy bust operation kag napatay sang mga operatiba sang Iloilo City Police Office (ICPO) nga wala na ang iya nga anak.
Matandaan nga natabo ang insidente sa North Baluarte Molo, Iloilo City kon sa diin ang biktima amo si Karl Daniel Bolante, 27, residente sang amo nga lugar, samtang ang matuod nga subject amo si Dave Mendoza, 23, kag residente sang Rizal Pala-Pala 2, Iloilo City Proper.
Sa interview sang Bombo Radyo kay Danilo Bolante Sr., amay sang biktima, iya ginpahayag nga bag-o natabo ang insidente, gin-abisuhan pa siya sang iya anak nga magpauli na bangud may yara sang mga nagalibot nga pulis.
Suno kay Bolante, sang yara na siya sa sulod sang ila balay, nakibot na lamang siya sang nakabati sila sang pila ka mga lupok sang pusil.
Halos indi makapati ang amay nga ang anak niya ang naluthangan-patay sa diin sang may yara sang paglinukpanay, wala man siya ginpahanugutan sang iban pa niya nga anak nga magwa sa ila nga balay.
Pahayag pa niya, mabuot kag inosente si Karl kag wala sang kamatuoran ang pahayag sang mga pulis nga may kaangtanan ang iya nga anak sa iligal nga droga.
Dugang pa ni Bolante, nagwa si Karl sa ila nga balay nga naka boxer short lamang kag may bitbit nga cellphone rason nga indi nila mahangpan ang pahayag sang mga pulis natuhoy sa narekober nga granada sa tupad sang iya nga anak.
