BALASAN, ILOILO – Mabuot kag mainabyanon.
Ini ang pagkilala sang iya mga himata kay Miss Universe Philippines 2020 Rabiya Mateo.
Sa interview sang Bombo Radyo kay Jun Mateo, tiyo ni Rabiya, iya ginpahayag nga nagdako si Rabiya nga may maayo nga paminatasan apisar sang pagbiya sa amay nga isa ka Indian national.
Suno kay Mateo, makabig nga Lola’s girl si Rabiya kun sa diin ang iya Lola amo ang nagbulig sa iya iloy sa pagpadako kag pagpaeskwela tubtub nakatapos bilang Cum Laude kag nangin licensed Physical Therapist.
Ginpahayag ni Mateo nga apisar sang mga pagpanghangkat sa kabuhi, nagapabilin sa gihapon nga positibo si Rabiya nga nagahandum nga makapadulong sa Estados Unidos agud makita ang iya biological father nga isa na ka American citizen.
Humalin sang Elementary, nakitaan na nga daan sang kaalam si Rabiya.
Sa interview sang Bombo Radyo kay Charito Gabana, Elementary teacher ni Rabiya, iya ginpahayag nga maayo sa reasoning ang Ilongga-Indian beauty.
Sa pagkamatuod suno kay Gabana, ginhuna-huna niya nga mangin isa ka abogada si Rabiya apang mas sobra pa diri ang iya nalab-ot.
Sa subong, ginpahayag sang natungdan nga tuman nga kalipay ang iya nabatyagan bilang anay manunudlo sang 23 anyos nga Miss Universe Philippines.
