ILOILO – May ipahamtang nga machine repair hubs sa kada probinsya sa pungsod para sa May 12, 2025 midterm elections.
Sa interview sang Bombo Radyo kay Atty. Dennis Ausan, Regional Election Director sang Commission on Elections (COMELEC) Region 6, iya ginpahayag nga ini ang labing una nga tion nga may yara sang technical repair hub nga ipahamtang ang poll body ang kada probinsya sa Pilipinas sa diin nalakip diri ang Iloilo.
Suno kay Ausan, ang nasambit nga inisyatibo ang may katuyuan nga mas mapadasig ang pagkaayo sang automated counting machines kun ini ang nag-malfunction.
Ginpahayag sini nga tuig 2022 ginadala pa sa Cebu ang mga nagguba ukon naaberya nga machines sang Western Visayas rason nga mas mabudlay kag madugay ini.
Nahibaluan nga may yara sang isa ka machine sa kada clustered precinct apang pahayag ni Ausan, may mga ipain man nga mga contingency machines sa tion nga mag-malfunction ang iban sa mga ini.
Sa Western Visayas, may yara sang 20,077 established precincts para sa 3.1 million nga mga registered voters.
Ginalauman naman nga magaabot ang automated machine sa Abril, 2025.
Sa idalom sang resolution sang COMELEC, nagakadapat nga makapatigayon pa sang final testing and sealing sang automated machine sa Mayo 2 tubtob Mayo 7 ukon antes ang aktwal nga adlaw sang piniliay.
