Nagpaathag ang isa ka dental health expert nga ang problema sa dental health sang isa ka tawo ang may daku nga kontribusyon sa iya kabug-usan nga ikaayong lawas.
Sa interview sang Bombo Radyo kay Dr. Hermina Ballesta Gonzales, iya ginpahayag nga kun ang isa ka tawo ang may madamo sang guba nga ngipon, mas mataas ang risgo sini nga makaangkon sang masakit pareho sang cardiovascular disease, diabetes kag respiratory infections.
Ginpaathag ni Dr. Gonzales nga ang bacteria halin sa baba ang mahimo magsulod sa bloodstream kag magkadto sa nagkalain-lain nga parte sang lawas, ilabi na sa tagipusuon, nga mahimo magresulta sa mas seryoso nga komplikasyon sa lawas sang isa ka tawo.
Ginpaandam man niya ang publiko nga seryosohon ang pag-amlig sang ila dental health kag indi ini pagpatumbayaan, bangud ini kabahin sang kabug-usan nga kaayuhan sang lawas.
Nahibaluan man nga subong nga bulan sang Pebrero ginaselebrar ang ‘Dental Health Month’ sa bilog nga pungsod bilang kabahin sang padayon nga kampanya sa paghatag sang impormasyon nahanungod sa pag-amlig sang oral health.
