Ginkumpirma ni Armed Forces chief of staff Romeo Brawner Jr. nga madamo nga mga pungsod ang nagsuporta kag nagpabutyag sang kahandaan nga buligan ang Pilipinas sa tunga sang mga pagpanghangkat nga gina-atubang sang pungsod sa teritoryo.
Ginpahayag ini ni Brawner kasunod sang iya meeting sa foreign counterparts sa sidelines sang 21st International Institute for Strategic Studies-Shangri-La Dialogue defense summit sa Singapore.
Suno pa sa opisyal, pila ka mga pungsod ang interesado nga magpatigayon sang bilateral meeting sa Pilipinas kag magtanyag sang assistance. Pahayag pa sini, nakibot siya nga may yara pa sang mga pungsod halin sa Europa ang interesado nga magkadto sa rehiyon agud nga buligan ang Pilipinas.
”A lot of countries who are here joining the Shangri-La Dialogue would like to have a bilateral meeting with us. We are happy about that because it only means to say that a lot of countries [are] interested in helping us with the situation. Not just interested to know what we think of the situation but really, they are offering us assistance, support,” pahayag sini.
Gindugang sang top military official nga ini nga mga pungsod ang mahimo makahatag sang ila assistance sa Pilipinas paagi sa joint exercises, training, joint operations, kag capacity development.
Sa pihak nga bahin, sa amo man nga event, may yara man sang serye sang bilateral talks si Defense Secretary Gilberto Teodoro Jr. sa iya counterparts sa Lithuania, Canada kag New Zealand kun sa diin natutukan man ang pagpadalom kag pagpasangkad sang defense kag security cooperation.
Byernes sang gin-deliver ni Marcos ang iya keynote address sa atubang sang international community kun sa diin ginpasalig sini nga indi mangampo kag mag-atras ang mga Pilipino sa tunga sang away sa teritoryo sa West Philippine Sea.
Gin-deklarar man sini nga isa na ka “act of war” kun may isa ka Pilipino nga mapatay bangud sa pagpang-atake sang China Coast Guard sa amo nga kadagatan.
Una na nga nagpahayag ang militar nga magapadayon ini sa pagpadala sang mga barko para sa regular conduct sang maritime kag aerial patrol sa West Philippine Sea apisar pa sang fishing ban nga ginapatuman sang China sa ila gina-angkon nga teritoryo.
Ini ang kabahin man sang pagsigurado nga safe ang mga manugpangisda nga Pinoy sa exclusive economic zone sang Pilipinas samtang nagapangisda nga amo lamang ang ila mayor nga palangabuhian.
