ILOILO CITY – Kombinasyon sang traditional kag moderno ang mangin performance sang walo ka school-based tribes nga magapasundayag sa Dinagyang Festival 2020.
Sa Good Morning Philippines program, ginpahayag ni Elvert Bañares, Chairman, Committee on Judges kag Souvenir Program, nga lauman ang madamu nga innovations ukon pagbag-o sa duha ka adlaw nga highlights sang Dinagyang Festival.
Suno kay Bañares, sa Enero 26, makit-an na sang tumalan-aw ang ginapabugal nga 360-dgerees performance kun sa diin ginlimitahan na ang paggamit sang risers kag dapat man nga laumaan kun ano nga mga surpresa ang ipakita sang tagsa ka tribu.
Ginpahayag ni Bañares nga halin sa organizer nga Iloilo Festivals Foundation Incorporated tubtub sa pagpanghanda, pagsulundan kag performance ang makabig nga bag-o.
Sa subong suno kay Bañares, masako na sa pag-ensayo ang walo ka tribu lakip na ang baragay tribes nga magapakigbahin sa Dagyang sa Calle Real kun sa diin ang tagsa ka miyembro sang tribu humalin sa warriors, drummers, propsmen kag choreographers ang may yara sang daku nga papel.
Sa adlaw mismo sang awarding ceremony, may yara sang patigayunon nga film showing kag iban pa nga aktibidad bilang kabahin sang Arts Festival kag pagahatagan man sang pagkilala ang artists nga amo ang sa likod sang manami nga performance sang tagsa ka tribu.
Bangud sa suporta nga ginahatag sang Iloilo City Government, ginpahayag sang natungdan nga wala sang rason nga indi mangin world class performance ang masaksihan sa Dinagyang Festival.
