ILOILO CITY – Madamo ang na-stranded nga pasahero sa pantalan matapos nga ginkansela ang byahe sang pump boat nga padulong sa Guimaras kag ang pabalik sa syudad sang Iloilo.
Santo sa abiso sang Philippine Coast Guard, umpisa 3:30 kaina sang hapon, ginpauntat ang byahe sang pump boat bangud sa mamadlos nga hangin kag mabalod nga kadagatan.
Ang iban sa mga pasahero nga magatabok sa Guimaras ang nagsakay sa Roll On Roll Off vessel kag sa fastcraft samtang ang iban nga may madamo nga bagahe ang nagbayad sang P150 agud nga makarga sa pump boat ang ila dala.
Suno sa mga pasahero, ang mga bagahe lang ang ginapahanugutan nga ikarga sa pump boat kag kuhaon lang ini sa pantalan sang Jordan ukon Buenavista.
Sa pagpaathag naman ni Captain Erlinda Benliro, commander sang Philippine Coast Guard – Iloilo, bisan nga maayo ang tiyempo apang ginkansela ang byahe bangud nga ila ginbasehan ang memorandum nga ginpaguwa sang Martime Industry Auhtority 6 sang nagligad nga tuig.
Suno kay Benliro, may yara sang gintalana nga limit sa kabaskugon sang hangin kag ang kataason sang balod kag ini ang pagabasehan kun ipadayon ukon ipauntat ang byahe sang pumpboat.
Kahapon sang hapon, naglapaw sa gintalana nga limit ang wind speed kag ang wavelength rason nga ginpauntat ang byahe.
