ILOILO CITY – Madamo nga mga Filipino ang apektado sang ginapatuman nga flight ban sa Qatar, sa tunga sang diplomatic crisis subong sa Middle East.
Sa report ni Bombo international correspondent Joshua Daturin nga tumandok sang Dingle, Iloilo apang sa karon nagatrabaho sa Doha, madamo nga mga pasahero ang stranded sa mga airports sa Qatar.
Kalakip na diri ang mga Pinoy nga may connecting flights sa iban nga pungsod, apang indi makaguwa sa Qatar bangud sa pag-untat sang biyahe sang major airlines paguwa kag pasulod sang nasambit nga pungsod.
Ang iban nga Qatari suno kay Daturin nga gusto makaguwa sa Qaar ang nagasakay na lang sa Philippine Airlines matapos nga ban ang Qatar Airways nga makaagi sa mga pungsod nga gin-utod ang relasyon sa Doha.
Apang sa karon ang nagapanguna nga concern sang mga yara sa Qatar kun tubtob san-o magdugay ang supply sang pagkaon kag iban pa nga basic needs.
Kalakip sa mga nagakaubusa na sang supply suno kay Daturin amo ang itlog, noodles, karne sang manok, gatas kag tubig.
Apang sa karon kontrolado pa sang Qatari government ang sitwasyon kag ginpasiguro nga maresolba ang krisis.
Wait and see naman ang mga Pinoy sa masunod nga tikang nga ila buhaton.
Suno kay Daturin, indi madali ang magguwa subong sa Qatar.