SAN MIGUEL, ILOILO – Ginpa-Bombo sang mga residente sang Barangay San Jose, San Miguel, Iloilo ang batching plant sang F. Gurrea Construction Inc. nga nagapagwa sang madamol nga yab-ok.
Ini matapos nga nagamasakit na ang mga residente nga naga-istar malapit sa batching plant.
Sa interview sang Bombo Radyo kay Corazon Cambronero, residente sang barangay, iya ginpahayag nga tuman ka apektado ang mga tigulang kag mga kabataan bangud ini ang gina-atake sang hapo ukon asthma.
Suno kay Cambronero, ang madamol nga yab-ok nga halin sa batching plant ang nakalab-ot na sa kaiping nga mga barangay.
Diri na ka nagtuga sang dako nga huol ang batching plant sa mga residente sang barangay.
Ginpahayag dugang sang natungdan nga magapatawag sang pagsinapol ang nasambit nga construction company sa mga residente agud maistoryahan ang problema.
Nagalaom naman si Cambronero nga mahimuan sang pamaagi sang construction company ang reklamo sang mga residente agud indi ang mga ini ma-expose sa yab-ok.
