Natumod sang Bureau of Fire Protection (BFP) kun ngaa madasig ang pagmakot sang kalayo sa nagluntad nga sunog sa Gaisano Grand Mall sa Barangay 8, San Jose, Antique.
Sa interview sang Bombo Radyo kay BFP Region VI Director Fire Senior Supt. Atty. Jerry Candido, iya ginpahayag nga naglatay ang kalayo sa live wire rason nga madasig ang pag-ibwal sang sunog sa bug-os nga mall.
Suno kay Candido, bangud sini, ginbudlayan sila sa pagpalong sang kalayo bangud nangin tuman kadasig ang paglapta sini sa diin kulang ang ila nga mga equipment.
Indi pa man mapat-od sang BFP kun sa Lady’s Wear sa Department Store ang matuod nga ginhalinan sang kalayo.
Ini bangud halin pa lamang ini nga impormasyon sa account ukon panaysayon sang mga tawo nga yara sa mall sang natabo ang insidente.
Pahayag ni Candido, tipunon nila ang tanan nga physical evidence agud matumod ang matuod nga ginhalinan sang kalayo.
Sa subong suno sa natungdan, delikado pa nga sudlon ang ikaduha nga panalgan sang mall bangud wala pa sa gihapon mapalong ang kalayo kag napeektuhan na ang integrity sang building.
