Ginaimbestigaran subong sang Los Angeles authorities ang illegal drone nga ginpalupad sa area sang wildfire kun sa diin nagresulta ini sa pagkaguba sang isa ka Canadian “Super Scooper” aircraft nga nagalupad sa Palisades Fire agud magbubo sang tubig sa sunog.
Ang nasambit nga drone ang nagbunggo sa CL-415 firefighting planes nga nagakarga sang masobra 1,500 gallons sang ocean water agud ibasya sa kalayo.
Maswerte naman nga wala sang reported injuries.
Suno sa Los Angeles Fire Department, sa subong, indi pa makalupad liwat ang eroplano bangud sa naangkon nga damage kag sa masunod nga semana pa ini makaayo kag makalupad liwat.
Nagapangabay naman ang otoridad sang bulig halin sa publiko agud makilala ang operator sang ginpalupad nga drone.
Nagpaandam man ang otoridad nga sin-o man nga magpalupad sang drone sa restricted airspace nga wala sang pahanugot ang mahimo mangatubang sang legal nga konsekwensya.
Suno naman kay Bombo Rachel Mackey, international correspondent sa California, sa subong, magluwas sa pagbato sa kalayo, problema man sang otoridad ang kinawatay sa mga balay nga wala sang tawo matapos nag-evacuate ang mga ini.
Pahayag ni Mackey, indi magnubo sa 10 ka mga tawo ang ginpangdakop sang kapulisan bangud sa pagpangawat kag iban pa nga sahi sang krimen naangot sa pagpanghingalit sa sitwasyon.
