ILOILO – Nagtuga sang stress sa COVID-19 positive ang madugay nga pag-release sang resulta sang iya RT-PCR test sa Qualimed Hospital Molecular Laboratory.
Sa interview sang Bombo Radyo kay alyas Lynn, hinablos sang COVID-19 positive, iya ginpahayag nga gin-updan niya ang iya nga tiyo sa nasambit nga ospital agud kuhaon kuntani ang resulta sang test sini amo man sang iya nga asawa.
Natingala na lang ang hinablos nga ang resulta sang iya nga tiyo ang wala ginhatag kundi ang iya lang sang tiya sini sa diin naguwa nga negatibo ini sa COVID-19.
Gin-abisohan na lamang si Lynn kag ang tiyo sini nga i-isolate kag gindala ini sa Emergency Room.
Bangud sini, ginpalab-ot sang duha sa ila pamilya sa Guimbal, Iloilo nga gin-isolate sila sa ospital kag hapon na sang sila ang ginkuha sang Rural Health Unit sang banwa.
Wala man sang may gin-presentar ang amo nga ospital sa Rural Health Unit may kaangtanan sa resulta sang RT-PCR test sang lalaki.
Sang yara na sa quarantine facility sang Guimbal, gin-quarantine ang mag-asawa kag ginkuhaan sang swab sample para sa COVID-19 testing kag nagguwa nga duha sila ang negatibo sa virus.
Apang makaligad ang isa ka semana, natukiban na lang nga nadala ang lalaki sa case bulletin sang Department of Health nga nagpositibo sa virus.
Mahimo nga ang nasambit nga resulta nga nalakip sa bulletin amo ang una nga resulta sini sa RT-PCR test sa ospital.
Sa subong, nagapabilin sa gihapon nga naka facility quarantine ang mag-asawa sa banwa sang Guimbal.
