Pursigido nga magpasaka sang kaso ang maestra batok sa maestro nga ginapatihan nadakpan sini nga naglingling kag nag-video sa iya samtang nagapaligo sa isa sa gin-install nga trapal nga CR sa Sub-Camp Tarangban, Brgy. Libot, Calinog, Iloilo.
Ang tagreklamo ang nagatudlo sa banwa sang Ajuy, ang ginreklamo amo ang manunudlo sang Bingawan, Iloilo.
Sa interview sang Bombo Radyo kay Police Major Myles Dieron, hepe sang Calinog Municipal Police Station, iya ginpahayag nga samtang nagapaligo ang maestra sa trapal nga CR, natalupangdan sini ang pag-ulhot sang cellphone nga halin sa pihak nga paliguan, kag didto namutikan nga ginakuhaan siya sang video.
Suno kay Dieron, gilayon nga nangayo sang bulig ang maestra sa iya mga kaupdanan.
Dugang pa sang natungdan, wala sang may natabo nga pag-aregluhanay bangud desidido nga magpasaka sang kaso ang tagreklamo.
Nahibaluan nga natabo ang insidente sa isa ka ginapatigayon nga provincial jamboree sa nasambit nga banwa.
Temporaryo nga nakagwa ang ginreklamo nga manunudlo matapos nakapyansa apang, posible nga magapangatubang ini sang kaso nga paglapas sa RA 11313 Safe Spaces Act ukon ang Bawal Bastos Law.
