Nakuhaan sang P1,802,000 nga balor sang suspected shabu ang mag-abyan sa ginpatigayon nga buy bust operation sang Provincial Drug Enforcement Unit (PDEU) sa Brgy. Poblacion South, Oton.
Ang main subject sa amo nga operasyon amo kanday Alyas Danilo, 50- anyos, kasado, residente sang Brgy. San Antonio, Oton, kag Alyas Ariel, 56-anyos, kag residente Poblacion South, Oton, lunsay High Value Individuals (HVIs).
Natigayon man nga madakop ang street level individual nga si Alyas Ryan, legal ang pang-edaron sang Poblacion South sa amo man nga banwa.
Natigayon nga makuha sa ila nga posisyon ang 265 tanan ka gramo sang ginapasuni illegal nga droga.
Sa interview sang Bombo Radyo kay Police Major Dadje Delima, head sang PDEU, iya ginpahayag nga nakaagi na preso si Alyas Ariel sang tuig 2016 kag nakagwa sang 2019 pinaagi sa plea bargaining agreement, samtang, si Alyas Danilo naman ang gin-attempt nga i-buy bust apang nakapalagyo ini.
Naglab-ot sa tatlo ka bulan ang monitoring sa mga subject kag base sa imbestigasyon, nagahalin sa Metro Manila kag Bakhaw, Mandurriao ang ila nga supply kag gina-distribute sa banwa sang Oton kag porsyon sang Tigbauan.#
(Article: Bombo Phauline Pillora)
