ILOILO CITY-Arestado ang mag- abyan nga hubog matapos nakuhaan sang iligal nga druga sa Barangay Sooc, Arevalo, Iloilo City.
Ang mga nadakpan amo sanday alyas Nove kag alyas Raffy.
Sa interview sang Bombo Radyo kay Police Captain Benjie Dicen, hepe sang Arevalo Police Station, iya ginpahayag nga ginrespondehan nila ang duha bangud nagabaisay ang mga ini sa kilid sang dalan matapos nakasagaid sa van ang ginasakyan nila nga tricycle nga ginamaneho ni Nove.
Suno kay Dicen, malagyo pa kuntani ang duha apang nadakpan kag narekober pa sa driver ang isa ka kutsilyo.
Sang ginrekisa naman, nakuha kay alyas Raffy sang duha ka sachets sang suspected shabu.
Gin-ako naman sang mga ini nga ginbakal nila Sooc ang iligal nga druga nga nagabalor P3,500.
Magapangatubang naman ang duha sang sampaw-sampaw nga kaso bangud sa paghupot sang illegal drugs kag makamamatay nga hinganiban.
