Arestado ang mag-abyan nga riders sa drug buy bust operation nga ginpatigayon sang City Drug Enforcement Unit (CDEU) sa Barangay Loboc, Lapuz, Iloilo City subong nga gab-i, Hunyo 16.
Ang main subject amo si alias Badong, residente sang Lapuz; kag ang kaupod sini amo si alias Ron-Ron, residente sang Jaro.
Pareho nga na-identify ang duha bilang high value individuals (HVIs).
Nakuha sa ila nga possession ang 125 gramos sang ginapasuni shabu nga nagabalor sang P850,000 kag ang 20 grams sang marijuana nga nagabalor sang P3,000.
Sa interview sang Bombo Radyo kay Police Captain Ryan Christ Inot, head sang CDEU, iya ginpahayag nga tatlo ka semana man ang ila nga monitoring antes ang operasyon.
Ginpahayag sini nga may record na si alias Badong sa awtoridad bangud na-preso man ini anay sang 2023 sa kaso nga pagbisita sa drug den, apang nakaguwa sang 2024.
Suno kay Inot, ang duha mismo ang nagadul-ong sang droga sa ila mga parokyano kag mga customer sa syudad.
Ginapahayag nga may source man ini diri sa Iloilo City, kag may gintuad man si alias Badong nga ginakuhaan sini sang suplay nga gina-verify pa sang kapulisan.
Yara na ang duha ka mga subject sa kustodiya sang pulis kag natalana nga mangatubang sang reklamo.#
