Dakop ang mag-amay lakip ang live-in partner sang bata sa ginpatigayon nga drug buy-bust operation sa Barangay Rizal, La Paz, Iloilo City.
Ginkilala ang mag-amay kanday alyas Panong, 48, alyas Koykoy, 23, kag alyas Faith, 24, live-in partner kag lunsay residente sang nasambit nga lugar.
Sa interview sang Bombo Radyo kay Police Captain Ryan Christ Inot, officer-in-charge sang Iloilo City Drug Enforcement Unit (CDEU), iya ginpahayag nga main subject sang operasyon amo ang bata lang kuntani nga si alyas Koykoy nga ginakabig sang mga otoridad nga high value individual.
Suno kay Inot, na-monitor ang illegal nga aktibidad sang mga subject bangud sa nabaton nga impormasyon gikan sa mga pumuluyo sang nasambit nga Barangay.
Gin-athag man sang natungdan nga nagaserbe nga runner ni alyas Koykoy sa illegal drug trade ang live-in partner nga si alyas Faith, samtang look-out naman ang amay sini.
Base sa mga Barangay officials, under monitoring si alyas Koykoy kag makapila na ini ka beses nga ginasaway nga indi mag-engage sa iligal nga droga.
Natigayon nga nakuhaan sang 50 grams nga suspected shabu ang mga subjects nga may standard drug price nga P340,000.
Sa subong, yara na sa kustodiya sang kapulisan ang tatlo ka mga nagkaladakpan kag nagapangatubang sang kaso nga paglapas sa Republic Act 9165 ukon Comprehensive Dangerous Drugs Act of 2002.
