ILOILO CITY–Gin-athag sang Philippine Coast Guard (PCG) nga nagapabilin sa gihapon nga missing ang duha ka mga tripulante nga sakay sang sakayan pandagat nga gindalasa sang isa ka RORO Vessel sa Iguana Bank sa Guimaras.
Ini matapos nga may duha ka lalaki nga naluwas ang PCG kahapon sang hapon sa kalalawran sang Brgy. San Roque, Anini-y, Antique.
Sa interview sang Bombo Radyo kay Lt. Commander Ramil Palabrica, taghambal sang Philippine Coast Guard, iya ginpahayag nga ang duha ka mga naluwas amo ang mag-amay nga sanday Jerry Baat Sr. 40 anyos kag Jerry Baat Jr. 20 anyos sang Brgy. Nalundan, Guimbal, Iloilo.
Santo sa pagpangusisa, nagpangisda ang mag- amay kahapon sang kaagahon kag naluwas sang PCG samtang nagapalutaw-lutaw sa kalalawran nga sakop sang Anini-y, Antique.
Sa subong suno kay Palabrica, padayon sa gihapon ang pagpangita sa duha ka mga missing nga tripulante nga sanday Rodel Despojo, 40 anyos kag Sixto Despojo, 30 anyos.