Ginaalegar nga ginpulihan kastigo sang mag-amay ang isa ka barangay kagawad sa Brgy. Caw-i, Batad, Iloilo matapos nga nagsinggitan.
Ang biktima amo si alyas Ramil, 49-anyos, kag isa ka barangay kagawad.
Ang mga suspek amo ang mag-amay nga sanday Alyas Jun-jun, 44-anyos kag si Alyas Kyle, 20-anyos, lunsay residente sang nasambit nga lugar.
Sa interview sang Bombo Radyo kay Police Master Sergeant Ma. Lota Barboza, imbestigador sang Batad Municipal Police Station, iya ginpahayag nga nagpauli ang kagawad sa ila puluy-an matapos nga nag-inom-inom kon sa diin, naglabay ini sa balay sang mag-amay kag didto man nga nagsinggitan.
Gilayon naman nga naguwa ang asawa sang amay nga suspek agud nga sawayon ang barangay kagawad bangud intentional ang iya nga ginasinggitan.
Suno kay Barboza, nagkuha sang video ang asawa sang suspek rason nga gintapi ini sang biktima.
Didto na kag nagsugod ang pagkastigo sang mag-amay sa barangay kagawad.
Nag-agum ang biktima sang pilas sa nagkalain-lain nga parte sang iya lawas kag sa subong, ginahulat pa ang resulta sang x-ray.
Nakaguwa naman ang mag-amay sa presohan kasunod sang nag-lapse na ang reglementary period.
Nagaguwa naman sa imbestigasyon nga may daan na nga mga hiligut-anon ang duha ka kampo nga nag-trigger man sa natabo nga insidente.
