Napatay gid ang mag-asawa kag tatlo ka tuig nila nga bata nga babaye matapos nakabunggo ang ginasakyan nila nga kotse sa isa ka truck sa Malungon, Sarangani.
Natabo ang trahediya sa national highway sang Barangay Talus.
Suno sa Malungon Municipal Police Station, halin ang magpamilya sa General Santos City kag padulong sa Davao City sang matabo ang aksidente.
Base sa imbestigasyon sang pulis, nagkadto sa pihak nga porsyon sang karsada ang kotse kun sa diin nasugata kag nabungguan sang mga biktima ang truck.
Yara na sa kustodiya sang pulis ang driver sang truck nga posible nga mangatubang sang reklamo.
