ILOILO CITY – Indi upang ang kasablagan sa lawas agud nga mangin isa ka maayo nga ginikanan.
Ini ang ginpamatud-an sang mag-asawa nga Ramon kag Leah Catacutan sang Zone 8, Veterans Village, Iloilo City kag lunsay mga bulag.
Sanday Ramon kag Leah ang nabulag sang naga-edad pa lang sila sadto sang tatlo kag anum ka tuig.
Nagkilalahay ang duha paagi sa ila trabaho nga pagmasahe tubtub nga nagdayunay kag naka-angkon sang tatlo ka kabataan.
Sa interview sang Bombo kay Ramon Catacutan, iya ginpahayag nga wala niya ginakabig nga upang sa pagpangabuhi ang iya pagkabulag.
Suno kay Ramon, nakapondar sila sang propidad nga mag-asawa kag napa-eskwela ang ila kabataan paagi sa ila paghimakas.
Ginpahayag ni Ramon nga ginapahangop nila nga mag-asawa sa ila kabataan nga dapat makuntento sa kun ano man ang may yara sila.
Bilang amay sang pamilya, ginpahayag sang natungdan nga wala sang imposible kun nagahimakas sa pagpangabuhi kag ang importante amo nga naghalin sa maayo nga pamaagi ang ginasagod sa pamilya.
Para naman sa tiayon ni Ramon nga si Leah Catacutan, iya gid nga ginapasalamatan ang Ginuo sa paghatag sa iya sang maayo nga bana kag mabuot nga mga kabataan.
Kasubong sang iya bana, ginpahayag ni Leah nga bisan madulom ang ila panulukan apang wala nila ini ginakabig nga rason agud nga indi mangin maayo nga ginikanan.
Samtang, sa baylo nga ikahuya, ginpahayag ni Lira nga iya gid nga ginapabugal ang iya mga ginikanan.
Suno kay Lira nga isa na ka manunudlo, wala niya nakitaan sang kahina ang iya amay kag iloy.
Ini bangud nga suno kay Lira, bisan nga may yara sang kasablagan ang iya ginikanan apang wala nila nabatyagan nga mag-ulutod nga sila ang ginpabay-an.
Ang iya nga amay kag iloy suno sa natungdan ang ginhimu niya nga inspirasyon sa pagkuha sang kurso nga special education.
