Isa ka masakit kag masubo nga istorya ang nagbukas sa publiko sa isa ka pamilya nga nagselebrar pa sang ila ‘new beginnings’ kuntani sa ila isa ka selfie antes ang trahedya.
Ginkilala ang mag-asawa nga doktor nga sanday Dr. Komi Vyas kag Dr. Prateek Joshi, upod ang ila tatlo ka kabataan, ang nagkuha pa sang malipayon nga selfie sa sulod sang Air India, kag wala gali sila nakahibalo nga ini na gali ang ila katapusan nga litrato upod bilang isa ka pamilya.
Si Dr. Vyas, nga nagatrabaho sa Udaipur, nagbiya na sa iya trabaho para magasugod kuntani sang ila bag-o nga kabuhi sa London, kaupod ang iya bana nga si Dr. Joshi kag ang ila mga anak.
Makita sa selfie ang ila mga anak nga kapid nga sanday Nakul kag Pradyut, lima ka tuig ang edad, kag ang ila 8-anyos nga anak nga si Miraya.
Suno kay Nayan, pakaisa ni Dr. Joshi: ”They left for Ahmedabad yesterday to take the flight to London. Prateek had come here just two days ago to take his wife and children with him. “
Ginapaninguhaan pa subong sang mga otoridad ang kompleto nga listahan sang mga napatay kag ang imbestigasyon sa nagluntad nga aksidente.
Sa subong, ang bug-os nga komunidad medikal kag mga pamilya sang mga biktima ang nagapangasubo sa natabo nga trahedya.
Text by: Bombo James Daccer Silverio
