CONCEPCION, ILOILO – Ginlubong na subong nga adlaw ang mag-asawa nga school principal kag manunudlo nga nabungguan-patay sang Mazda MX5 sports car sa Sen. Benigno Aquino Jr., Avenue, Mandurriao, Iloilo City.
Gintambungan sang mga himata, kaupod sa trabaho, suod nga abyan, kakilala, ginikanan kag estudyante ang lubong nanday Joe Marie Osano, Principal sang Lapaz II Elementary School kag Alnie Dinah Osano, Master Teacher sang Ticud Elementary School, sa Concepcion, Iloilo.
Gikan sa Brgy. Aglosong, gindala sa Concepcion Catholic Church ang bangkay sang mag-asawa para sa 2:00 sa hapon nga misa bag-o ginlubong sa Concepcion Catholic Cemetery.
Subong man nga adlaw, ginasaulog ang ika-50 nga kaadlawan sang biktima nga si Joe Marie Osano.
Sa interview sang Bombo Radyo kay Fr. Lorenz Torreflores, classmate ni Joe Marie Osano, iya ginpahayag nga kasubo panumdumon nga ginbawi gilayon sang Ginuo ang kabuhi sang mag-asawa.
Ginpahayag ni Fr. Torreflores nga kun tani, maka-angkon sang kalinong ang kalag sang duha ka mga biktima.
Si Fr. Torreflores ang tumandok sang Brgy. Nanga, Guimbal, Iloilo apang 18 anyos na nga na-assign bilang kura paroko sang isa ka parokya sa Laoag.
Nagalaum naman si Rowena Cariño, Division Supervisor sa School’s Division of Guimaras, iya ginpahayag nga hustisya ang iya nga ginapangayo para sa mag-asawa.
Ginpahayag ni Cariño nga daku nga kadulaan sa Department of Education (DepEd) ang kamatayon sang mga biktima.
