Ginlaslasan sang mag-asawa nga Roque si Surigao del Norte 2nd District Rep. Ace Barbers nga chairperson sang quad committee sa Kamara bangud sa pag-claim nga ang misis ni anay presidential spokesperson Harry Roque ang incorporator sang Philippine offshore gaming operator (Pogo) hub nga Lucky South 99.
Sa statement ni Mylah Roque, ginpahayag sini nga mapang-abuso nga klase sang tawo si Barbers.
Wala sang bisan isa ka papel suno sa iya nga nagaangot sa iya sa Lucky South 99 nga gin-raid sang mga pulis sa Pampanga sang nagligad nga Hunyo bangud sa na-report nga iligal nga mga aktibidad.
“Ace Barbers is an abusive individual. He abuses his immunity from libel with a claim that I am an incorporator of Lucky South even when there is no single document linking me to it,” pahayag sang misis sa isa ka Facebook post.
Matandaan nga nag-isyu ang quad comm sang show cause order kay Mylah para nga patambungon ini sa hearings.
Sunod nga ginbuyagyag ni Barbers nga chair sang panel nga naglupad na pa-Singapore ang asawa nga Roque kag indi mabaton ang medical certificate nga ginpasa sini sa Kamara agud ma-justify ang iya pag-absent.
Nag-depensa naman si Mylah nga ang iya pagpa-Singapore ang para sa iya treatment apang malisyoso gid ang mga interpretasyon ni Barbers.
Sunod man nga gindepensahan ni Harry Roque ang iya asawa kag gin-kwestyon si Barbers kun ngaa ginadalahig sini ang iya pamilya.
Matandaan nga una na ginhangkat ni Barbers si Roque nga ‘magpakalalaki’, magpakita na liwat sa quad comm kag indi lamang maghal-paguwa sang statement sa social media.
