Patay ang mag-asawa nga nagasakay sa Isuzu mu-X matapos nabungguan sang truck sa Barangay Amamaros, Pototan, Iloilo.
Ang mga biktima amo sanday Emil Pagtolon-an, isa ka seaman kag Merren Pagtolon-an, manunudlo, kag lunsay residente sang Bagacay, Passi City, Iloilo.
Sa interview sang Bombo Radyo kay Commander Felipe Galino, sang Mountain Tigers Search and Rescue Incorporated Pototan Unit, iya ginpahayag nga naghalin sa Iloilo City ang mu-X kag papuli kuntani sa Passi City sang matabo ang aksidente.
Samtang, naghalin naman ang truck sa Pototan, Iloilo kag padulong sa Iloilo City.
Suno kay Galino, nag-overtake ang mu-X sa ginasundan nga salakyan.
Diri kag nasumalang sang mu-X ang truck nga madasig ang pagpadalagan.
Nahibaluan nga ginlapak sang truck ang mu-X sa diin nagdugay pa sang duha oras antes nakuha ang lawas sang mga biktima sa ila salakyan.
Padayon pa ang imbestigasyon sang Pototan Municipal Police Station natuhoy sa natabo nga insidente.
