Napamatud-an sang mag-asawa sa Oton, Iloilo nga may katapusan gid ang mga pagtilaw kag may paglaum gid sa kabuhi ang kada isa.
May kaangtanan ini sa pagselebrar sang Easter Sunday nga nagadul-ong sang mensahe sang panibag-o nga kabuhi pagkatapos sang pag-antos.
Ang mag-asawa amo sanday Junry Sencil kag Ancel Marie Sencil, lunsay 30 anyos ang edad kag nagapuyo sa Sta. Monica, Oton.
Sang 2022, Si Junry ang naaksidente sa San Miguel, Iloilo kag ini ang nagbag-o gid sa iya kabuhi.
Suno kay Toto, naguba gid ang iya nawong sa amo nga aksidente kag nabali ang iya tiil.
Magluwas diri, wala naman siya nakatrabaho bangud sa iya sitwasyon.
Pahayag niya, sa sulod sang isa ka tuig nga yara lang ini sa ila balay samtang naga-recover, halos nadulaan ini sang paglaum, tubtob isa ka adlaw, may nalantaw ini nga isa ka online post nga naghatag sa iya sang bag-o nga perspektibo sa kabuhi.
Suno kay Junry, paagi sa amo nga post nga may tig-ulo nga “beautiful soul”, nakilala niya si Ancel Marie nga isa ka writer.
Si Ancel Marie ang naghatag sa iya sang paglaum sa kabuhi tubtob nga nahulog ang buot nila sa isa kag isa, nangin magkarelasyon kag nagpakasal sila.
Ginpahayag ni Junry nga nag-abot si Ancel sa iya kabuhi sang tion nga ginakinahanglan niya ini.
Suno naman kay Ancel Marie, malipayon siya nga nangin palaagyan ang iya mga sinulatan agud maghatag sang paglaum sa iban.
Mas nalipay man ini nga ang paglaum nga iya nahatag ang nangin palaagyan man agud mahimo ang isa ka matahum nga istorya sang ila paghigugma.
